Туслăх кĕперĕ татах та çирĕплентĕр
Бердянск округĕпе ĕçлĕ çыхăну çулсеренех çирĕпленсе пырать. Раççей йышĕнчи çĕнĕ региона шефла пулăшу парасси йăлана кĕнĕ.
Акă çак кунсенче Бердянск округĕнчи вĕренÿ учрежденийĕсен ертÿçисем 24-ăн Чăваш Ене килсе çитнĕ. Вĕсене валли анлă программа хатĕрленĕ. Республикăри шкулсемпе ача сачĕсене çитсе курнă май хăнасем вĕренÿ тытăмĕнчи чи лайăх ĕçсемпе паллашма пултараççĕ. Ĕçлĕ тĕлпулу вăхăтĕнче вĕренÿри çĕнĕлĕхсене тишкереççĕ, пĕрлехи проектсене сÿтсе яваççĕ.
Аса илтеретпĕр, Бердянск делегацийĕ Чăваш Енре пĕрремĕш хут кăна мар. Пĕлтĕр «Вĕренÿ» тытăмĕнчи чи ăнăçлă программăсемпе паллашма майсем туса панă. Педагогсемпе вĕренÿ учрежденийĕсен ертÿçисем валли онлайн мелĕпе семинарсем йĕркеленĕ.
Элĕк округĕ Бердянск округĕнчи Андреевка ача садне шефла пулăшу парать. Пĕрре кăна мар аякри тăвансем патне гуманитари пулăшăвĕ ăсатнă. Акă ĕнер Элĕк енре Андреевка ача сачĕн воспитателĕ Ирина Роенко пулнă. Вăл чи малтанах 1-мĕш номерлĕ «Çăлкуç» ача садне çитсе курнă. Сăмах май, вĕсен те ача сачĕ «Çăлкуç» ятлă. Ирина Александровна ача садĕнчи вĕренÿ тата кану условийĕсемпе паллашнă. Чăваш педагогĕсен пуян опычĕ вĕсен ĕçĕнче питех кирлине палăртнă. Хăнана Элĕк муниципаллă округ пуçлăхĕн çумĕн тивĕçĕсене пурнăçлакан Людмила Ильина тата ача сачĕн заведующийĕ Лариса Соколова вĕренÿ учрежденийĕпе паллаштарнă. Тĕрлĕ ушкăнри ачасем концерт программипе кăмăла çĕкленĕ. Агролабораторири çитĕнÿсемпе те мухтанма пултарнă çамрăк пахчаçăсем.
Çак кун Ирина Александровна Тавăтри «Пучах» ача садĕнче, Элĕкри «Хĕлхем» спорт шкулĕнче тата литературăпа таврапĕлÿ музейĕнче пулса курнă. «Чăваш Республикинче пĕрремĕш хут кăна пулин те хама питĕ лайăх туятăп. Чăннипех те ырă, кирек хăçан та пулăшу пама хатĕр çынсем пурăнаççĕ кунта. Вĕренмелли çав тери нумай. Пирĕн регионсем хушшинчи туслăх тата та çирĕпленессе шанатăп», - тенĕ вăл. Ача садне панă гуманитари пулăшăвĕшĕн тав тунă.
М.ЛЕОНТЬЕВА.
Новости
Прогноз погоды