Сергей Волков фермер – малтисен йышĕнче
Октябрĕн 30-мĕшĕнче Чăваш патшалăх оперăпа балет театрĕнче Ял хуçалăхĕпе тирпейлекен промышленнăç ĕçченĕсен кунне анлă паллă тунă. Кунта Чăваш Енри ял хуçалăх отраслĕн тата тирпейлекен промышленнăç ĕçченĕсем, ветерансем килсе çитнĕ. Пухăннисене Чăваш Республикин Пуçлăхĕ Олег Николаев саламланă.
«Цифрăсем уççăнах Чăваш Республикинче пулса иртнĕ тата паянхи улшăнусене кăтартаççĕ. Çак çулсенче эпир чылай вăйлă регионсемпе танлашма пултартăмăр, çав шутра аграри секторĕнче те. Пирĕн малашнехи тĕллев – тирпейлес ĕçе анлăлатасси та çĕнĕ шая тухасси. Эпир тирпейлеме тата сутма вĕренсе çитрĕмĕр. Халĕ эпир апат-çимĕçпе хамăра кăна тивĕçтерместпĕр, ытти регионсене те йывăр лару-тăрура пулăшма пултаратпăр» - тенĕ Олег Алексеевич аграрисене çут çанталăк условийĕсене тата тĕнчери лару-тăрăва пăхмасăрах çитĕнÿсем тума пултарнишĕн тав туса.
Ял хуçалăх министрĕ Сергей Артамонов пĕлтернĕ тăрăх, Чăваш Республикин социаллă пурнăçĕпе экономика аталанăвĕн комплекслă программинче ума лартнă тĕллевсене пурнăçланă. Халĕ вара 2030 çуллчченхи аталану çул-йĕрне – «АргоПродвижение» стратеги проектне пурнăçлассине палăртма вăхăт çитнĕ. Ун тăрăх чĕр тавара 25 процент ытларах туса илмелле, экспорт 1,5 хут ÿсмелле, 85 агрокласс уçмалла. Çавăн пекех апат-çимĕç хăрушсăрлăхĕпе тивĕçтерессипе çыхăннă Раççейри наци проекчĕн кăтартăвĕсене пурнăçламалла.
Уява Элĕк муниципаллă округ пуçлăхĕ Александр Терентьев, фермер хуçалăх ертÿçисемпе ĕçченĕсем, АПК ветеранĕсем хутшăннă. С.П.Волков хресчен фермер хуçалăхĕн ертÿçи Сергей Волков республикăри фермер хуçалăхĕсем хушшинчи экономика кăтартăвĕсем тăрăх 3-мĕш вырăн йышăннă. Ăна Сергей Артамонов вице-премьер диплом парса чысланă. Сергей Волков фермер çулсеренех Ял хуçалăх министерстви ирттерекен ăмăртура малти вырăнсене йышăнать.
Аса илтеретпĕр, Элĕк енре Ял хуçалăх ĕçченĕсен кунне ноябрĕн 15-мĕшĕнче паллă тума палăртнă.
М.ЛЕОНТЬЕВА.
Новости
Прогноз погоды