Иван Яковлев ĕçне малалла тăсаççĕ
Кăçал И.Я.Яковлев ячĕллĕ Элĕкри вăтам шкул уçăлнăранпа 170 çул çитнине паллă тăвать. Пĕрисем ăна юбилей теççĕ. Теприсемшĕн вăл çавра çул çеç. Апла-и, капла-и - 170 çул вăл хăех сумлă пулăм пулнине çирĕплетет. Çавăнпа та Элĕк шкулĕн коллективĕ ăна тимлĕхсĕр хăварман. Çĕнĕ вĕренÿ çулĕ пуçланнăранпах халĕ вĕренекен тата тĕрлĕ çулсенче вĕренсе тухнисем онлайн мелĕпе салам презентацисем «вĕçтереççĕ».
Шкул 170 çул çитнине тĕпе хурса октябрĕн 29-мĕшĕнче Элĕк шкулĕнче «И.Я.Яковлевăн халăха вĕрентес шухăшсене пурнăçа кĕртнин опычĕ» ятпа ăслăлăхпа практика конференцийĕ иртрĕ. Кунта Чăваш патшалăх педагогика университечĕн преподавателĕсемпе студенчĕсем килсе çитрĕç. Икĕ вĕренÿ заведенийĕ те чăваш халăхне çутта кăлараканĕ Иван Яковлев ячĕпе хисепленсе тăрать-çке. Çавăнпа та пĕр-пĕрин опычĕпе паллашни малашнехи ĕçре питех те пысăк пĕлтерĕшлĕ.
Хăнасем конференци умĕн Элĕкри литературăпа таврапĕлÿ музейĕнче пулса курчĕç. Ку çурта хăй вăхăтĕнче Иван Яковлев тимленипе туса лартнă. Хăй те темиçе хут та Элĕк тăрăхне килсе кунти ĕçсемпе паллашнă. Ольга Алексеева музей директорĕ хăнасене «Элĕк шкулĕн историйĕ» куравпа паллаштарчĕ, шкултан вĕренсе тухнă паллă çынсем çинчен каласа пачĕ.
Конференци Элĕк шкулĕн актсен залĕнче иртрĕ. Ăна шкул директорĕ Владислав Волков уçрĕ. Пухăннисем умĕнче Элĕк округĕн пуçлăхĕн çумĕн тивĕçĕсене пурнăçлакан Людмила Ильина, Лев Ефимов профессор, вăлах конференцие ертсе пыраканĕ пулчĕ, университет ректорĕ Игорь Кожанов тухса калаçрĕç. Игорь Владимирович Элĕк шкулĕн коллективне 170 çулхи çавра çулпа саламларĕ, асăнмалăх И.Я.Яковлев портретне парнелерĕ.
Пленарлă ларура педагогика университетĕнчи И.Я.Яковлевăн ăслăлăхпа тĕпчев лабораторийĕн ертÿçин Лев Ефимовăн, Владислав Волков шкул директорĕн, вырăс чĕлхипе литература вĕрентекенĕн Наталия Кузьминан доклачĕсене кăсăкланса итлерĕç. Вĕсем Элĕк тăрăхĕнчи çынсен кун-çулĕпе тачă çыхăннă, шкул аталанăвĕн тапхăрĕсене çутатса панă.
Конференцире истори ăслăлăхĕсен докторĕ Тихон Сергеев, педагогика ăслăлăхĕсен кандидачĕ, Чăваш халăх писателĕ Анатолий Кибеч, Элĕк енри АПК ветеранĕсен Канашĕн председателĕ Николай Сергеев тухса калаçрĕç. Элĕк шкулĕн вĕрентекенĕсемпе университет преподавателĕсем сăмах илчĕç. Кашниех Иван Яковлев пуçарнă ĕçсем паянхи педагогикăра та пысăк пĕлтерĕшлĕ пулнине палăртрĕç, хăйсен ĕçĕнчи опытпа паллаштарчĕç.
Конференцире «И.Я.Яковлев ячĕллĕ Элĕк вăтам шкулĕ çинчен Эсир мĕн пĕлетĕр;» викторина çĕнтерÿçисене чысларĕç. Элĕк шкулĕн вĕренекенĕсем хăйсен пултарулăхĕпе савăнтарчĕç. Фойере технологи урокĕсенче хатĕрленĕ ĕçсен куравĕпе паллашма май пулчĕ.
М.ЛЕОНТЬЕВА.
Новости
Прогноз погоды